來源：蘋果日報
張衞健報喜: 媽咪醒喇!
張衞健（Dicky）媽咪余嘉碧日前喺酒店游水遇溺昏迷，喺伊利沙伯醫院深切治療部留醫，噚晚八點幾，Dicky 向傳媒宣佈好消息：「之前有啲保留，怕媽咪一直昏迷，噚日佢有打開過眼，今日已經完全醒嘞，講嘢有反應，但仲要用呼吸機，嚟緊醫生要幫佢練習唔使用呼吸機，媽咪好清醒，真係奇蹟，多謝天主、上帝同當日嘅急救員，仲有醫生、護士！」
張衞健噚晚宣佈母親蘇醒，仲話係個奇蹟。
要靠呼吸機
媽咪情況好轉，Dicky 回復少少風趣講笑話：「噚日係呢十幾年嚟我冇沖涼就瞓，完全太攰。」Dicky 透露媽咪雖脫離危險期，但仍要靠呼吸機幫助呼吸，所以暫時唔會轉病房，嚟緊仲要繼續檢查肺同腦。Dicky 好友許志安都有嚟，Dicky 話安仔走時，媽咪識得揮手拜拜㖭，原來Dicky帶埋吉祥物嚟祝福媽咪，佢話：「老婆話帶罐頭鮑魚等媽咪醒番見到開心吓，但我就帶咗麻雀嚟，等佢用手甩吓。」對於前女友江欣燕話以為冷凍治療係美容療程，Dicky 聽到都笑，仲話媽媽好錫欣欣，遲啲會發短訊多謝佢。至於係咪酒店疏忽，佢就話要了解吓先，相信媽咪日後唔會只係游乾水。
另曾同 Dicky 不和嘅細佬張衞彝（Henry），下午喺醫院講到媽咪情況時情緒激動咁話：「媽咪完全講到嘢，好精神，有晒反應。」
(來源：蘋果動新聞)
沒有留言:
發佈留言