【報紙】茶餐廳阿姐爭住合照 張衛健揸機任影

* 編按:
相關影片可以按這裡觀看。

日期: 2019年5月31日
來源: 頭條日報 / 東周網 East Week

茶餐廳阿姐爭住合照 張衛健揸機任影

張衛健呢期被翻舊史，有網民喺討論區爆料話佢同老婆張茜結婚前，曾有段時間冷戰，期間搭上有線VJ Monique(歐綺霞)，講緊係起碼15年前，係又點唔係又點，都咁耐啦，嘥氣。健仔入行35年，咩風浪未遇過?日前下午，戴住Beanie，一貫Signature打扮嘅健仔一支公喺尖沙咀茶餐廳食Lunch，飯後幾個餐廳阿姐圍住求合照，健仔即幫阿姐揸手機自拍，o氹得阿姐們勁開心。

健仔細細粒，同啲阿姐無乜距離感，自拍更開心。

健仔同老婆張茜養咗隻貓仔叫米花，都好黐健仔。

本來許志安同健仔喺五月初上郵輪開兩場Show，因為「安心事件」，安仔要停工，健仔為咗唔想安仔賠過百萬，答應頂替唱足兩場，據知10月重陽節時仲有兩場，健仔繼續頂，有情有義。

月初母親節，健仔本來同安仔拍住上郵輸做Show，o依家要一個人頂晒。

張衛健孭飛的無線劇《大帥哥》收視高企，播畢幾個月人氣依然強勁。

份人真心Nice

張衛健之前公開講過，考慮做棟篤笑或挑戰做舞台劇，做乜都好，觀眾一定支持，事關健仔好有觀眾緣，食餐晏都被阿姐們包圍。日前下午，健仔喺尖沙咀iSquare附近餐廳食Lunch，食完出門口時拎住杯外賣奶茶，幾秒後幾位餐廳阿姐湧住出嚟捉住健仔影合照，健仔笑住幫阿姐拎手機自拍，影完再吹幾句水就行去隔籬等待客泊車職員車返架車畀佢，等候其間無嘢好做，最好就係講電話，幾分鐘後接返架車，再畀50蚊貼士走人，Bye。

泊車職員好好服侍，對健仔非常恭敬。

健仔將杯外賣放喺枱仔，方便自己講Voice Msg。

健仔挨住幅牆講電話，點望都唔似54歲。