【報紙】洪永城爆《大帥哥》12月播

日期: 2018年10月8日
來源: 蘋果日報

【嘈嘈嘈唔好嘈】洪永城爆《大帥哥》12月播 台慶劇變炮灰檔

張衞健離巢20年後重回無綫拍嘅第一部劇《大帥哥》，未播出已謠言滿天飛。當大家以為套劇喺今年台慶月推出，點知一拖再拖，一時話女主角蔡思貝形象太差，一時又傳大陸批文未搞掂，至播出遙遙無期。

健仔去年2月出席《大帥哥》簽約儀式，背景板寫明係台慶劇。

噚日有份演出嘅洪永城(Tony)喺ig解開謎團，爆料指《大帥哥》將重見天日，佢上載一張與健仔嘅劇照，然後話﹕「馬炭：『大哥呀，究竟幾時播呀？出邊好多謠言啊，又話呢樣又話嗰樣...』大帥哥：『嘈嘈嘈唔好嘈，其他人道聽途說，你就要跟佢哋嘅咩？！後生仔唔使急，好嘢係值得等待，準備好12月見啦。』 #大帥哥」。唔少劇迷都話等到頸都長，但亦有心水清嘅網民留言﹕「好慘，炮灰期」。事關每逢聖誕同元旦都有唔少港人外遊，多少都會影響收視。

當日由兩位高層珍姐同樂易玲陪陪行紅地毯，好架勢。

洪永城露玄機話12播，有心水清網友即話「炮灰期」。

健仔拍劇向來認真，無得做台慶劇，有冇啲失望呢？

仲記得去年2月，健仔喺無綫兩大高層曾勵珍同樂易玲陪同下一齊行紅地毯，出席《大帥哥》簽約儀式，話係50周年台慶劇，連背景板都有埋，聲勢浩大。如今淪為炮灰檔期，唔知健仔有冇啲失望呢？！