【報紙】張衞健暗示或缺席宣傳

日期: 2018年10月8日
來源: 蘋果日報

【無綫冇約實】《大帥哥》硬食年底炮灰期 張衞健暗示或缺席宣傳

早前無綫大鑼大鼓邀請張衞健（Dicky）返港拍攝劇集《大帥哥》實牙實齒點名呢套係重頭劇，點知台慶將近，呢套劇竟然押後至年底12月先至播出，唔少精明網民一睇到件事就覺得呢套劇成為炮灰，亦有說蔡思貝形象唔好拖累劇集被抽起。

《大帥哥》

Dicky近年一直喺大陸發展，今日佢喺中環出席一個慈善跑活動，與體操王子李小鵬互動，對方話有睇Dicky電視劇集，兩人互稱相逢恨晚，仲即場交換微信聯絡。

其實延播消息一出，Dicky已經講過一次「I do really don’t know。」，今日佢再補充：「真係唔知道，因為冇正式收到無綫通知宣傳。」無綫好似唔上心，而原本為台慶劇被抽起，Dicky再重申：「我唔知呀，I don't know。」佢同大家回顧歷史：「「由新入行喺TVB拍劇，你當係得過嘅劇，《西遊記》孫悟空、《鹿鼎記》韋小寶都未試過喺台慶劇時間播放，我講我咁大個仔喺無綫，對我嚟講好Casual。」佢話接拍《大帥哥》，係想有個機會用廣東話拍電視劇畀香港人睇。

Dicky冇正式收到無綫通知宣傳，而11月尾答應咗太太去旅行。

劇集安排到12月先播出，好可能又係一個炮灰期，Dicky話：「我冇諗快定幾時，只希望觀眾鍾意，如果鍾意我嘅嘢，觀眾就會鍾意。」Dicky冇擔心劇集會被抽起唔播成倉底貨，因為仲有其他工作要忙，亦唔會失望。

Dicky重溫歷史，佢以前受歡迎啲劇，都唔係台慶劇。

至於若12月播出，會否返港宣傳？Dicky話：「11月尾應承咗太太去二人世界，幾年前已經承諾咗太太，兩公婆要多啲二人世界，我嘅生日願望都係想人生展開新嘅一篇章，唔係日日做嘢返工，同埋喺私人生活方面彌補番對太太同家人陪伴不足，慈善我都有做，但想趁自己仲有影響力時候再做多啲。」