【報紙】張衞健拉隊食海鮮

日期: 2018年10月8日
來源: 蘋果日報

【邊個係主角先】張衞健拉隊食海鮮 洪永城 蔡思貝頭貼頭冧住影合照

張衞健（Dicky）離開大台超過20年，去年返去拍當時話係台慶劇嘅《大帥哥》，點知最後傳劇集會被安排喺12月「炮灰」檔期播。Dicky當時仲話11月尾會同老婆張茜去旅行，意味唔會出席劇集宣傳活動。

張衞健噚晚同合作拍劇演員相約食海鮮。

不過，Dicky最近原來返咗香港，噚晚仲約埋一班《大帥哥》演員去鯉魚門食海鮮，有份同Dicky撐枱腳嘅包括洪永城、蔡思貝、譚凱琪、曹永廉、楊秀惠、徐榮同埋張達倫。

男人堆影合影。

楊秀惠趁萬聖節用手機app影咗張變臉相應下節。

有份去飯局嘅，今日都分別喺自己Ig貼相，曹永廉仲落力宣傳，貼相之餘仲加hashtag寫「大帥哥聚會」、「12月3日大帥哥」，楊秀惠就貼咗好多張唔同人組合嘅大合照相，其中一張仲見到緋聞情侶洪永城同蔡思貝頭貼頭影嘅相，從相片所見,洪永城明顯飲咗幾杯落肚,兩邊臉飲到紅卜卜，身邊嘅蔡思貝就笑得相當冧,唔知關唔關企喺身邊嗰個係洪永城事呢？