【報紙】 《大帥哥》12月TVB有得播

日期: 2018年10月8日
來源: 晴報

張衞健踢走倉底貨污名 《大帥哥》12月TVB有得播

話說傳聞是咁的，離巢多年的張衞健，舊年在TVB高層曾勵珍誠意邀請下，重返娘家拍《大帥哥》，當時Dicky透露推了不少工作，抽出半年檔期拍攝，更加不問酬勞，只求有充足休息時間，雖然套劇舊年9月就拍完，但由於有大量後期製作，故有指延至今年台慶月播出，但點知最近TVB公布台慶劇名單，分別為《是咁的，法官閣下》、《跳躍生命線》與《兄弟》，不見《大帥哥》蹤影，更有指《大》已淪為倉底貨。 

而《大帥哥》的死因更有兩個版本，有指由於TVB安排該劇與內地同步播放，但由於內地批文遲遲未出，故播出日期被逼無限期押後；但另一方面又有傳是女主角蔡思貝惹禍，事關蔡小姐負面是非一籮籮，加上唔聽高層話，所以TVB決定小懲大戒喎！ 

不過傳聞歸傳聞，有份拍《大帥哥》的洪永城近日突然於IG報喜：「嘈嘈嘈唔好嘈，其他人道聽途說，你就要跟佢哋嘅咩？！後生仔唔使急，好嘢係值得等待，準備好12月見啦。」留言一出，網民都顯得好興奮，更有人話《大帥哥》是今年最值得期待的TVB自家劇，其實今年TVB自家劇的收視可謂慘不忍睹，就連重頭作《再創世紀》的收視亦只是徘徊2字頭邊緣，到底張衞健能否再創當年《老友鬼鬼》、《西遊記》等神話，為娘家一洗近年的收視頹風？大家就要拭目以待咯！

 《大帥哥》講啲乜？ 故事背景發生於民國初年、軍閥割據的年代，張衞健飾演的主角狄奇一無是處，但就憑藉古惑頭腦，與洪永城等兄弟屢見奇功，獲升為旅長入主昇威鎮，更獲上級賞賜蔡思貝、譚凱琪與楊秀惠三位靚女做老婆，張衞健一心諗住做山寨王享清福，點知鎮上發生連串離奇事件，原來革命軍與日本都有派臥底入鎮，而健仔的老婆當中有人是臥底，內裡更隱藏驚天秘密，爆發連場笑彈。