【報紙】《大帥哥》大陸唔俾批文

日期: 2018年10月4日
來源: 蘋果日報

張衞健《大帥哥》點解變倉底貨？大陸唔俾批文

張衞健(Dicky)喺96年當年喺《西遊記》飾演孫悟空而爆紅，之後佢離開咗無綫而返大陸賺人仔，雖然Dicky喺大陸賺到笑，不過舊年喺高層曾勵珍嘅力邀之下，宣佈回巢拍台慶劇《大帥哥》，嗰陣佢仲話係慶祝TVB台慶50週年，決定推job抽半年時間返去娘家拍劇，Dicky仲話不問酬勞，只係要求有足夠睡眠時間。

Dicky話當日珍姐力邀先回巢拍劇。

聽講呢套劇喺舊年9月就拍完，之後做後期嘅工作，大家仲以為呢套劇順利成章喺今年嘅台慶月播出，點知日前大台公佈台慶劇名單，分別係《跳躍生命線》、《是咁的，法官閣下》同埋《兄弟》，偏偏冇Dicky嘅蹤影，今日有周刊報道話《大帥哥》將會淪為倉底貨。

有傳劇集遲遲未播，係因為蔡思貝緋聞是非多。

報道話本來無綫同Dicky講呢套劇會喺今年暑假播，本來仲預咗時間返嚟做宣傳，Dicky都一直好著緊，希望可以拍一套高質嘅廣東話劇，點知最後播映冇期，報道話係因為女主角蔡思貝形象太差，加上又唔聽話，於是無綫決定小懲大戒，結果拖累咗成套劇。

本來呢套劇喺今年暑假推出。

之不過聽聞呢套劇遲遲未播出，有傳係因為大陸批文問題，因為喺今年3月，無綫宣佈同優酷、TVBC共同推出「全球同步劇系列」，有10幾部新劇俾咗獨家播版映權俾優酷，其中《大帥哥》、《跳躍生命線》、《是咁的，法官閣下》、《兄弟》、《危城First Lady》等等，希望同步播出，結果一炮雙響，就連香港都唔播。

今日《蘋果》向Dicky了解，佢話：「I do really don’t know。」之後又問佢會唔會係受蔡思貝拖累，佢就話：「她拍戲很認真，很尊重我及其他同事。」